आगेजुङ गुम्बा
तेजपुञ्जका रुपमा शक्ति उत्पत्ति भएको र यसै क्षेत्रमा पूर्वाञ्चलकै पुरानो गुम्बा अवस्थित भएको मानिएकोले तेजपुञ्ज र शक्ति पुञ्जका विषयमा रुद्राक्षरन्य हिमवतखण्डमा उल्लेख भएको पाइन्छ । यो मेची राजमार्गले छोएको पाँचथरको भारपा, पञ्चमी र थर्पु गाविसको सिमानामा छ । समुद्री सतहबाट करिब एक हजार पाँचसय फिटको उचाईमा अवस्थित यस गुम्बा पूर्वाञ्चलकै सबैभन्दा पुरानो गुम्बा हो । यस गुम्बामा बस्ने लामा पुरोहितहरुले यहाँ निरन्तर पाठ गरिरहन्छन् । यहाँ लामा पुरोहित उत्पादन गर्न बौद्ध शिक्षा दिइने आगेजुङ गुम्वालाई तेजुञ्ज नामले पनि पुकारिन्छ । २०१६ सालमा निर्मित यस गुम्बामा रिम्पोछे र शिव पार्वती, इन्द्र, महाकाली र बुध्दका अग्ला अग्ला प्रतिमुर्ति सजाइएका छन् । हरेक वर्ष बैशाख पुर्णिमा, मंसिर पुर्णिमा र फागु पुर्णिमामा मेला लाग्ने यो स्थानमा हिन्दु र बौद्ध मार्गीहरुले पटक पटक यज्ञ र पुराणको आयोजना गरिसकेका छन् ।
यस आगेजुङ गुम्बाबाट सदरमुकाम फिदिम, पौवाभञ्ज्याङ र सिलौटी जस्ता स्थानको दृश्यावलोकन गर्न सकिन्छ । मेची राजमार्ग अन्तर्गत झापा, इलाम फिदिम हुँदै जोरपोखरी सम्मको सवारी यातायात पश्चात करिब एक घण्टा तिस मिनेटको पैदल यात्रामा पुगिने आगेजुङ गुम्बासम्म जाने भक्तजन पर्यटक र यात्रुको सुविधालाई ध्यानमा राखेर यतिखेर धमाधम मोटरबाटो निर्माण गरिँदैछ ।