सिलौटी
पौवाभञ्ज्याङबाट करिब २५ मिनेटको यात्रापछि सिलौटी मन्दिर पुगिन्छ । राष्ट्रिय बिभूति तथा किराँत धर्मका प्रणेता फाल्गुनन्द लिङदेनको तपोभूमिका रुपमा परिचित सिलौटीको उचाई समुद्री सतहदेखि करिव आठ हजार आठसय छपन्न फिट छ ।
महागुरु फाल्गुनन्दले भारतमा लाहुरे जीबन बिताएर फर्केपछि १० लिम्बुवानका मानिसलाई भेला गराएर सत्यधर्म मुचुल्का तयार गरेको ठाँउ पनि सिलौटी मन्दिर नै हो । महागुरुको समाधिस्थल पनि सिलौटी मै छ । समाधिस्थल भएको क्षेत्रमा नेपाल टेलिकमको रिपिटर टावर र त्यसको सुरक्षार्थ खटेका नेपाली सेनाको टुकडी पनि यँहि छ । किराँत धर्मगुरू तथा सामाज सुधारक फाल्गुनन्दको समाधिस्थल मात्र नभई सत्य धर्मको घोषणा गरेको स्थान पनि भएकोले सिलौटी किराँत धर्माबलम्बीहरुले एक पटक अनिवार्य पुग्नै पर्ने स्थान पनि हो । किराँत माङहिमका नामले चिनिने मन्दिर समेत रहेका कारण सिलौटीमा मासिक ५ देखि १० हजारको हाराहारीमा नेपाल र विदेशवाट किराँत धर्माबलम्बी र आन्तरिक एबं केहि मात्रामा विदेशी पर्यटक पनि यहाँ पुग्छन् । महागुरु अहिंसा र शान्तिका प्रतिक भएका कारण यस क्षेत्रमा मासु मदिरा निशेध गरिएको छ ।