पौवा भञ्ज्याङ
मेची राजमार्गको इलाम हुँदै पाँचथर सदरमुकाम फिदिम आउने क्रममा पौवा भञ्ज्याङ एक रमणीय स्थलको रुपमा रहेको छ । समुद्री सतहबाट आठ हजार दुईसय फिट उचाईमा अवस्थित पौवाभञ्ज्याङ मेची राजमार्गले छोएको सवैभन्दा अग्लो स्थान हो । फिदिम र रानिटार गाविसको सिमानमा पर्ने यो स्थलमा पुष माघमा हिँउ पर्ने हुनाले पाँचथर सहित, इलाम, झापा मात्र नभएर छिमेकी भारतको सिक्किम र दार्जिलिङ सम्मका मानिस हिँउ खेल्न र बनभोज खान आँउछन् । यहाँ आउनेका लागि खाने बस्ने होटल र लज स्थानीय वासिन्दाले सञ्चालन गरेका छन् ।
पौवाभञ्ज्याङको सरसफाईमा पनि स्थानीय त्यहाँका बासिन्दा वर्षौं देखि कृयाशिल छन् । यहाँबाट सेताम्मे हिँउ परिरहने कञ्चनजंघा, कुम्भकर्ण लगायत थुप्रै हिमाली श्रृङ्खलाहरू र तराईका फाँट पनि प्रष्टसँग देख्न सकिने भएकाले पौवा भञ्जाङ प्राकृतिक दृश्यावलोकनमा रमाउने ब्यक्तिहरूका लागि एक उत्कृष्ठ गन्तब्य पनि हो ।